Ya Zopdit Mazya Lyrics किती आनंदी आनंद या झोपडीत माझ्या

राजास जी महाली सौख्ये कधी मिळाली

ती सर्व प्राप्त झाली या झोपडीत माझ्या

भूमीवरी पडावे ताऱ्यांकडे पहावे

प्रभुनाम नित्य गावे या झोपडीत माझ्या

पहारे आणि तिजोऱ्या, त्यातुनि होती चोऱ्या

दाराशी नाही दोऱ्या, या झोपडीत माझ्या

जाता त्या महाला मज्जाव शब्द आला

भीती न यावयाला, या झोपडीत माझ्या

महाली मऊ बिछाने कंदील शामदाने

आम्हा जमीन माने या झोपडीत माझ्या

येता तरी सुखे या, जाता तरी सुखे जा

कोणावरी न बोजा, या झोपडीत माझ्या

पाहून सौख्य माझे, देवेंद्र तोही लाजे

शांती सदा विराजे, या झोपडीत माझ्या

'तुकड्या' मती करावी, पायी तुझ्या नमावी

मूर्ती तुझी रहावी, या झोपडीत माझ्या